ശ്ലോകം 29

 ജനനമരണങ്ങളോ വാർദ്ധക്യമോ, രോഗമോ, ഭൗതികശരീരത്തെയല്ലാതെ ആത്മീയശരീരത്തെ ബാധിക്കുകയില്ല. ആത്മീയശരീരത്തിന് ഇവയൊന്നുമില്ലാത്തതിനാൽ അത് സിദ്ധിച്ചവർ ഭഗവത് സഖാക്കളിലൊരാളായിത്തീരുന്നതോടൊപ്പം, നിത്യഭക്തിയുതസേവനത്തിലേർപ്പെടുകയും ചെയ്യും. അയാളാണ് വാസ്തവത്തിൽ മുക്തൻ. അഹം ബഹ്മാസ്മി. ഞാൻ ബ്രഹ്മമാണ്. ഈ ശ്ലോകത്തിൽ വിവരിച്ച തുപോലെ താൻ ബ്രഹ്മമാണെന്നൊരാൾ മനസ്സിലാക്കണം. ഭക്തിയുതസേവനത്തിലും ഈ ബ്രഹ്മഭാവന നിലകൊള്ളുന്നു. ശുദ്ധഭക്തന്മാർ അഭൗതികമായ ബ്രഹ്മഭൂതാവസ്ഥയിൽ സ്ഥിതിചെയ്യുന്നവരായതുകൊണ്ട് അഭൗതികങ്ങളായ പ്രവർത്തനങ്ങളെപ്പറ്റി അവർക്ക് നന്നായറിയാം.

   ഭഗവാന്റെ ആദ്ധ്യാത്മികസേവനത്തിലേർപ്പെട്ടിരിക്കുന്ന അവിശുദ്ധരായ ഭക്തന്മാർ നാലു വിധത്തിലുണ്ട്. അവരെല്ലാം താന്താങ്ങളുടെ ലക്ഷ്യത്തിലെത്തിച്ചേരും. ഭഗവത്കാരുണ്യത്താൽ കൃഷ്ണാവബോധം തെളിഞ്ഞുകിട്ടിയാൽ കൃഷ്ണണനുമായി അവർക്ക് ആത്മീയസമ്പർക്കാനുഭൂതിയുണ്ടാവുകയും ചെയ്യും. ദേവാരാധകർക്കാകട്ടെ, പരമോന്നതമായ ഭഗവല്ലോകത്തിലെത്തി അദ്ദേഹത്തെ സമീപിക്കാനാവില്ല. ഗോലോക വൃന്ദാവനമെന്നറിയപ്പെടുന്ന കൃഷ്ണന്റെ വിശിഷ്ട ധാമത്തിൽ ബുദ്ധികുറഞ്ഞ ബ്രഹ്മസാക്ഷാത്കാരം ലഭിച്ചവർക്കുപോലും പ്രവേശനമില്ല. വാസ്തവത്തിൽ കൃഷ്ണാവബോധപൂർവ്വം പ്രവർത്തിക്കുന്നവരേ, ബ്രഹ്മൻ എന്ന് വിളിക്കപ്പെടാനർഹരായുള്ളൂ. (മാമാശ്രിത്യ) അവരാണ് ശരിക്കും കൃഷ്ണന്റെ ലോകം പ്രാപിക്കാൻ യത്നിക്കുന്നത്. കൃഷ്ണനെപ്പറ്റി യാതൊരു മിഥ്യാധാരണയുമില്ലാത്തവർ ബ്രഹ്മൻ തന്നെ.

  ഭഗവദ്വിഗ്രഹം വെച്ചാരാധിക്കുന്നവർക്കും, ഭൗതികബന്ധങ്ങളിൽ നിന്ന് മുക്തി നേടാൻവേണ്ടി മാത്രം ധ്യാനത്തിലേർപ്പെട്ടിരിക്കുന്നവർക്കും ഭഗവാന്റെ കാരുണ്യത്താൽ അടുത്ത അദ്ധ്യായത്തിൽ വിവരിക്കാൻപ്പോകുന്ന അധിഭൂതാദി ബ്രഹ്മോപാധികളെപ്പറ്റി അറിവുണ്ടാകും.